Azərbaycanlı məşqçi: "İş yoxdur, həmkarlarım balıq tutub satır"

Azərbaycanlı məşqçi: "İş yoxdur, həmkarlarım balıq tutub satır"
İDMAN
8-01-2021, 16:22
A+
A-
"Artıq bir ilə yaxındır çalışıram ki, səsimizi eşitsinlər. Amma nəticəsiz qalır. Bakı Şəhər Gənclər və İdman Baş İdarəsinə, həmçinin Gənclər və İdman Nazirliyinə məktub yazmışam. Heç bir cavab yoxdur. Uşaq liqası bir ildir əziyyət çəkir".
Bu fikirləri "Report"a açıqlamasında üzgüçülük üzrə məşqçi Yana Xasyanova üzləşdiyi problemlər barədə danışarkən deyib.
Avropa Azərbaycan Məktəbi və "Şüa" İdman-Sağlamlıq Kompleksində 8 - 12 yaşlı uşaqlara məşq keçən mütəxəssis məşqçilərin 1 ilə yaxındır işsiz olduğunu bildirib: "Həmkarlarım nəinki işsiz, həm də qazancsız qalıblar. Öz hesablarına məzuniyyətə göndəriliblər. Yaxşı idmançılarımız var. Onlar hələ də üzgüçülüyə maraqlarını itirməyiblər. Bacardığım qədər dəstək verirəm, dəniz kənarında məşqlər keçirəm, onlarla onlayn qaydada çalışıram. Amma bilirsiniz ki, hovuzsuz üzgüçülərə çox çətindir, mümkün deyil".
Xasyanova pandemiya dövründə ən çox azyaşlı idmançıların əziyyət çəkdiklərini söyləyib: "Onlara görə üzülür, məyus oluram. Halbuki həmin uşaqlardan biri gələcəkdə böyük idmançı ola, nüfuzlu turnirdə ölkənin bayrağını ucalda bilər. Milli komanda üçün icazə alınıb, ötən ilin iyunundan məşq edirlər. Uşaq üzgüçülük liqası və digər idman növləri isə məhv olur".
Dünyada üzgüçülük üzrə yarışların keçirildiyini xatırladan məşqçi bir müddət öncə Gürcüstanda beynəlxalq turnirə dəvət aldıqlarını vurğulayıb: "Rusiya və Türkiyədə yarışlar davam edir. Hazırda üzgüçülük bəlkə də ən təhlükəsiz idman növüdür. Məşqləri dayandırmayan idmançılarımızdan heç biri virusa yoluxmadı. Xlorlu su, 100 faizlik dezinfeksiya, böyük ağciyər həcmi, yüksək immunitet. Paltardəyişmə otağına gəlincə, avtobuslarda az adam olur? Təbii ki, yox. Bütün məsələlərə, hətta soyunub-geyinmə otağı məsələsinə də baxmaq olar".
Xasyanovanın sözlərinə görə, tətbiq olunan qadağalar elə də effekt vermir: "Yoluxmaqdan qorxan evdə oturanda da xəstələnir. Digərlərinə yaşamaq imkanı vermək lazımdır. Onsuz da hamı öz hesabına müalicə olunur. Belədə niyə işə çıxmağa qoymurlar? Rusiya və Türkiyədən olan həmkarlarım hovuzlarda öz işlərini davam etdirirlər. Düzdür, bir saatlıq ziyarətçi sayında məhdudiyyətlər var. Amma insanları aldatmırlar. Onlara seçim şansı verirlər".
O, Azərbaycanda çalışan bəzi həmkarlarının ailəsini dolandırmaq üçün fərqli sahələrə üz tutduqlarını deyib: "Bəzi məşqçilərimiz yayda balıq tutub satırdılar. Maşını olan taksi fəaliyyəti ilə məşğul olmağa başladı. Halbuki onların hamısı ali təhsillidir. İndi heç kimə lazım deyillər, ortada qalıblar. İdman yoxdursa, Gənclər və İdman Nazirliyi, qurumun minlərlə əməkdaşı niyə işləyir? Qoy, nazirlik cavab versin ki, niyə vəziyyət belədir? Avqustda hər 100 kvadratmetrdə 5 nəfər olmaq şərtilə idman zallarının açılması barədə müzakirə gedirdi. Sonra isə susdular".
Xasyanova problemin həlli üçün Gənclər və İdman Nazirliyinə müraciət və ya etiraz etməyin mənasız olduğunu bildirib: "Kollektiv şəkildə etirazımız olmayıb. Çünki heç bir mənası yoxdur. Hazırda orada heç kim yoxdur, hamı evdən işləyir. Nazirliyin e-mail ünvanına yazmışam. Cavab vermirlər. TƏBİB-ə istinad edirlər. Bu isə hər kəsə qadağalar qoyan və heç bir şeyə cavabdeh olmayan qəribə təşkilatdır. Yalnız işəgötürənlərə müraciət etmişik. Həmçinin davamlı olaraq sosial şəbəkələrdə paylaşımlar edirəm".
Gənclər və İdman Nazirliyinin İdman şöbəsindən isə "Report"a bildirilib ki, bütün idmançıların vəziyyəti diqqət mərkəzində olsa da, hər şey Nazirlər Kabinetinin qərarları əsasında müəyyənləşir: "Vəziyyəti başa düşürük. Bizim də ən böyük arzumuz odur ki, idmançılarımız məşqlər etsinlər, Elə idman növləri var ki, xüsusilə üzgüçülüyün inkişafı, idmançıların geridə qalmaması üçün onlara suda intensiv məşqlər çox lazımdır. Amma bu, bizdən asılı məsələ deyil. Hər şey Nazirlər Kabinetinin qərarları əsasında müəyyənləşir. Yalnız qərar veriləndən sonra nə isə demək olar. Sual yarana bilər ki, bunun üçün Nazirlər Kabinetinə müraciət etmişikmi? Bəli, etmişik. Bizim üçün də idmançıların sağlamlığı, onların yaxşı formada qalması ən önəmli amillərdən biridir".скачать dle 12.1